करमाळ्यात शुक्रवारी कृषी प्रदर्शन; निर्यातक्षम केळी व डाळिंब या विषयावर परीसंवादाचे आयोजन…

शेतकऱ्यांनी लाभ घेण्याचे पाणी फाउंडेशनचे आवाहन…
करमाळा, प्रतिनिधी – तालुक्यातील शेतकऱ्यांनी शेतीतील नवनवीन ज्ञान व तंत्रज्ञान आत्मसात करण्यासाठी पाणी फाउंडेशन करमाळा यांच्या पुढाकारातून आणि कृषी योद्धा शेतकरी गट (फिसरे), राजे रावरंभा शेतकरी प्रोडूसर कंपनी (करमाळा) व कुंभारगाव ऍग्रो प्रोडूसर कंपनी यांच्या संयुक्त विद्यमाने कमलाई कृषी प्रदर्शनाचे आयोजन करण्यात आले आहे. शुक्रवार दि. २७ डिसेंबर २०२४ रोजी शहरातील अथर्व मंगल कार्यालय (देवीचा माळ) येथे सकाळी ९ वाजता हे कृषी प्रदर्शन भरणार आहे.

पोलीस अधीक्षक (सोलापूर ग्रामीण) अतुल कुलकर्णी यांच्या हस्ते व सागर वाकचौरे (कळस कृषी प्रदर्शन,ता. संगमनेर ) यांच्या प्रमुख उपस्थितीमध्ये या प्रदर्शनाचे उद्घाटन करण्यात येणार आहे. या प्रदर्शना दरम्यान होणाऱ्या परिसंवादात कृषीतज्ञ्, केळी जाचक पॅटर्नचे जनक कपिल चाचक व डाळिंब मार्गदर्शक, कृषी तज्ञ, उद्यम पंडित राहुल रसाळ तसेच पाणी फाउंडेशनचे प्रमुख मार्गदर्शक डॉ.अविनाश पोळ हे मार्गदर्शन करणार आहेत. या प्रदर्शनामध्ये फळबाग रोपे, जी ९- केळी टिशू कल्चर, डाळिंब, आंबा, एक्झॉटिक भाज्या व फळांची रोपे, हायटेक नर्सरी, सेंद्रिय शेती व उत्पादने, दहा ड्रम संच, गांडूळ खत, बायोगॅस, माती परीक्षण, गावरान सेंद्रिय बियाणे- भाजीपाला, अद्ययावत तंत्रज्ञान व स्मार्ट शेती, हवामान संच, सोलर पंप, फवारणी ड्रोन, ठिबक संच-उपकरणे, बजाज ऑटो, शेततळे कागद, शेटनेट हरितगृह, पशुधन, पशुखाद्य, मधुमक्षिकापालन, कुक्कुटपालन, मत्सव्यवसाय, शेती विषयक संस्था, कृषि विभाग, गट शेती, शेतकरी उत्पादक कंपनी, कृषि उद्योग व लघु उद्योगासाठी कर्ज बँक आदी स्टॉल असणार आहेत. शिवाय महाराष्ट्राची शान असलेली खिलार बैलजोडी व देश-विदेशातील श्वान हे या प्रदर्शनाचे प्रमुख आकर्षण राहणार आहे.

या प्रदर्शनात फार्मर कप मधील महिला गटांचा विशेष सन्मान करण्यात येणार असून उपस्थित महिलांतून लाडकी बहीण लकी ड्रॉ द्वारे विजेत्या महिलेला शिलाई मशीन भेट देण्यात येणार आहे. या प्रदर्शनात पानी फाऊंडेशन, कृषि विभाग-महाराष्ट्र शासन, उमेद अभियान, यशवंतराव चव्हाण महाविद्यालय करमाळा, करमाळा पोलीस स्टेशन, SV मॉल, वॉटरशेड ऑर्गनायझेशन ट्रस्ट या संस्था सहभागी असणार आहेत.

विनामूल्य प्रवेश असलेल्या या प्रदर्शनाचा लाभ शेतकरी बांधवांनी घेण्याचे आवाहन करमाळा तालुका पाणी फाउंडेशनचे समन्वयक प्रतीक गुरव व आशिष लाड यांनी केले असून या प्रदर्शनात स्टॉल बुकिंगसाठी ९७२३५२१४००, ८६६८९८३२६२, ९९०१८४८३१२ या क्रमांकावर संपर्क साधण्याचे आवाहन आयोजकांनी केले आहे.

अत्यंत खडतर परिस्थितीमध्ये करमाळा तालुक्यातील महिला एकत्र येऊन प्रथमच आपापल्या गावामध्ये महिलांचे गट स्थापन करून शेती करत आहेत. त्यांना प्रोत्साहन देण्यासाठी घोटी, शेलगाव क, पोटेगाव, फिसरे, कुंभारगाव, वीट, सरपडोह, हिसरे, साडे व कोर्टी येथील महिला शेतकरी गटांचा समारोप कार्यक्रमात विशेष सन्मान होणार आहे. तसेच तुर या पिकामध्ये विक्रमी उत्पन्न घेणारे राहुल राऊत (कुंभारगाव)व मका या पिकांमध्ये विक्रमी उत्पन्न घेणारे अक्षय शेंडे (घोटी) यांचाही या कार्यक्रमात विशेष सन्मान होणार आहे.

.

.

.

.

.