विविध सामाजिक उपक्रमाद्वारे प्रा.रामदास झोळ यांचा वाढदिवस साजरा…
करमाळा, प्रतिनिधी – करमाळा तालुक्याच्या सर्वांगीण विकासासाठी सर्वसामान्य जनतेच्या न्याय हक्कासाठी आपण कार्यरत असून शेतकरी, कामगार, सर्वसामान्य जनता, विद्यार्थी यांच्या हितासाठी कार्यरत राहुन करमाळा तालुक्याचा विकास हाच माझा ध्यास असल्याचे प्रा. रामदास झोळ सर यांनी सांगितले.
दत्तकला शिक्षण संस्थेचे अध्यक्ष प्रा. रामदास झोळ (सर) यांच्या वाढदिवसानिमित्त प्रा. रामदास झोळ मित्र परिवाराच्या वतीने सत्कार समारंभाचे आयोजन करमाळा येथील बारा बंगले या ठिकाणच्या संपर्क कार्यालयात करण्यात आले होते. प्रा. रामदास झोळ सर फाउंडेशन करमाळा यांच्या वतीने दुष्काळी परिस्थितीमध्ये वाढदिवसाचा अनावश्यक खर्च टाळून सामाजिक उपक्रमांद्वारे वाढदिवस साजरा करण्यात आला.
प्रा. रामदास झोळ यांच्या वाढदिवसाच्या निमित्ताने करमाळा तालुक्यातील बलभिम महाराज बालक आश्रम पांगरे, रत्नप्रभादेवी पाटील आश्रम केम ,जगदंबा कमलाभवानी मुकबधिर निवासी विद्यालय देवीचामाळ करमाळा, ज्ञानप्रबोधन मतिमंद विद्यालय कोर्टी या शाळांमध्ये मिष्टान्न भोजन देण्यात आले. तसेच मुक्या प्राण्यांच्या, पक्ष्यांच्या पिण्याच्या पाण्याची सोय करण्यासाठी वनविभागातील पाणवठे टॅंकरद्वारे भरवुन देण्यात आले असून करमाळा तालुक्यातील दहा गावांत एकुण ५२ बाकडे बसवण्यात आले आहेत. तसेच पाणी टंचाईची समस्या लक्षात घेऊन टॅंकर द्वारे पाणीपुरवठा करण्यासाठी नियोजन करण्यात येणार असल्याचे सांगितले आहे.
यावेळी सत्काराला उत्तर देताना प्रा. रामदास झोळ (सर) म्हणाले की, करमाळा तालुक्यामध्ये व्यावसायिक अभ्यासक्रमाची एकही संस्था कार्यरत नाही. त्यामुळे करमाळा तालुक्यातील अनेक विद्यार्थी-विद्यार्थीनींची कुचंबना होत आहे. ही बाब लक्षात घेऊन तालुक्यात एक उत्तम शैक्षणिक संकुल उभारणार असल्याचे सांगितले. त्यासाठी करमाळ्यानजीक देवळाली परिसरात जमीन खरेदी केलेली आहे. वैद्यकिय अभ्यासक्रम तसेच व्यवस्थापन व संगणकीय अभ्यासक्रम करमाळा तालुक्यात उपलब्ध नाहीत. त्यामुळे करमाळा तालुक्यातील विद्यार्थ्यांना तालुका सोडून बाहेर जावे लागते. यामुळे गरीब विद्यार्थ्यांना तसेच मुलींना शिक्षणा पासून वंचित रहावे लागते. ही बाब लक्षात घेऊन तालुक्यात असे शिक्षण सुरू करण्याच्या दृष्टीने संस्थेने विचार केला आहे. त्यानुसार देवळाली परिसरात की जी जागा शिक्षणासाठी सर्वांना उपयुक्त होईल; अशी खरेदी केलेली आहे. लवकरच शैक्षणिक उपक्रम सुरू करण्यात येईल; असेही प्रा. झोळ यांनी सांगितले.
प्रा. रामदास झोळ सर यांच्या वाढदिवसानिमित्त करमाळा तालुक्यातील शैक्षणिक सामाजिक सांस्कृतिक राजकीय विविध क्षेत्रातील मान्यवरांनी त्यांना प्रत्यक्ष भेटून सत्कार करून, फोनद्वारे, सोशल मीडियाद्वारे शुभेच्छा दिल्या आहेत.