डिझेल चोरी करणारे टोळीतील आरोपी ५ तासाच्या आत अटक; करमाळा पोलीस ठाणे यांची कामगिरी…

करमाळा, प्रतिनिधी – रोड लगत विश्रांती करीता थांबलेल्या वाहनांची टाकी फोडून डिझेल चोरणाऱ्या टोळी पैकी एकाला करमाळा पोलिसांनी मुद्देमालासह अटक केली आहे. डिझेल चोरीची फिर्याद दाखल झाल्यानंतर अवघ्या पाच तासात या घटनेतील टोळीचा छडा लावल्यामुळे करमाळा पोलिसांनी केलेल्या या धाडसी कारवाईचे कौतुक होत आहे ‌

याबाबत करमाळा पोलिसांनी दिलेल्या माहितीनुसार दि. १९/०३/२०२४ रोजी तालुक्यातील जातेगाव येथे रात्रीचे वेळी अहमदनगर ते करमाळा रोडलगत थांबलेल्या कंटेनरमधील डिझेलची चोरी झाल्याची फिर्याद दाखल झाल्यानंतर अज्ञात इसमा विरूद्ध करमाळा पोलिसांनी गुन्हा नोंद केला होता. सदर गुन्हयाच्या तपासकामी पोलीस निरीक्षक विनोद घुगे यांच्या मार्गदर्शनाखाली सदर गुन्हयातील अज्ञात आरोपींचा शोध घेणेसाठी पोलीस पथक तात्काळ रवाना झाले. गोपणीय बातमीदार तसेच तांत्रीक विश्लेषणाचे आधारे शोध घेतला असता सदर गुन्हयातील डिझेलची चोरी करणारी टोळी करमाळा परीसरात असल्याची माहिती पोलिसांना प्राप्त झाली. या गोपणीय माहितीच्या आधारे आरोपींचा शोध घेतला असता सदरचे आरोपी हे पोलीसांना पाहुन त्यांचेकडील वाहनातुन पळुन जात होते. करमाळा पोलीस ठाणेचे पोलीस पथकाने त्यांचा पाठलाग करून पकडले.

पाठलागाअंती या टोळीतील एक आरोपी अनिल सुभाष पवार (रा. मांडवा, ता. वाशी, जि.धाराशीव) यास अवघ्या ५ तासाच्या आत ताब्यात घेऊन अटक करून याबाबत अधिक तपास केला असता त्यांची डिझेल चोरी करणारी टोळी असल्याचे निष्पन्न झाले. सदर आरोपीकडे तपास करून त्यांच्या टोळीतील इतर आरोपींची नावे निष्पन्न करण्यात आली असुन त्यांचा शोध घेण्याचे काम सुरू आहे. यासोबतच गुन्हा करण्यासाठी वापरलेली स्कॉर्पिओ क्र.एम.एच.२३ ए.डी.४३५८ तसेच चोरी केलेले ४५ लिटर डिझेल, डिझेल भरण्याचे प्लास्टिक कॅन, प्लास्टिकचा बांगडी पाईप तसेच डिझेलची टाकी फोडण्यासाठी बनवलेले हत्यार व स्कु ड्रायव्हर असा एकुण रू.५ लाख ५४ हजार ९५ रूपयांचा मुद्देमाल जप्त करण्यात आला आहे.

सदरची कामगिरी उपविभागीय पोलीस अधिकारी अजित पाटील तसेच पोलीस निरीक्षक विनोद घुगे यांच्या मार्गदर्शनाखाली पोलीस उपनिरीक्षक विनायक माहुरकर, पो.हे.कॉ. अझहर शेख, पो.हे.कॉ. बालाजी घोरपडे, पो.हे.कॉ. राजेश रोडगे, पो.ना. चंद्रकांत ढवळे, पो.शि. सोमनाथ जगताप, पो.शि. जालिंदर गोरे आणि पो.ड्रा. मेजर आनंद पवार यांनी केली आहे.

व्यावसायिक वाहन चालकांनी रात्रीचे वेळी आराम करण्यासाठी सुरक्षित ठिकाणी वाहन थांबवावे व आपल्या वाहनाची व वाहनातील किंमती मालाची काळजी घ्यावी. कोणताही गैरप्रकार निदर्शनास आल्यास तात्काळ करमाळा पोलीस ठाणेस संपर्क साधण्याचे आवाहन पोलीस निरीक्षक विनोद घुगे यांनी केले आहे.